toki a!
mi soweli Tesa! anu soweli Lote! ni li lipu mi pi toki pona. lipu ni la
mi wile toki pona!
lipu ni li lon tan ni: toki pona li suli tawa lawa mi. ona li pona mute
li wawa mute tawa mi.
ni la mi wile toki mute kepeken toki pona!!!
lipu ni la mi wile toki e ijo ni:
toki pona li seme?
toki pona li suli li pona tawa mi tan seme?
toki pona li toki pi nimi lili
toki ante la toki pona li lili mute a!!
ni la toki pi toki pona en kama sona pi toki pona li ken musi mute tan
ni:
toki pona li sama ala toki ante!
toki pona li suli tawa mi tan ni: ona li musi li suwi mute!!
mi kama sona toki pona tan ni: tenpo pini pi kama sona la mi pilin ike
mute
pilin ike la mi ken ala tawa weka pi supa lape mi
mi ken ala pali
mi ken ala musi
ni la mi wile sona e ni: mi wile pona e pilin mi la mi o seme a?!
mi lukin e toki pona
ni li sona pi wile mi a!
mi ken kama sona pi toki pona lon supa lape mi!
mi ken musi! mi ken pali a!!
ni la toki pona li pana e pona mute tawa pilin mi!!
tenpo lon la ona li awen pona e pilin mi. mi sitelen e lipu pilin
kepeken toki pona
ni li pona mute tan ni: mi sitelen e pilin ike kepeken toki Inli la
sitelen ni li ike
mi lukin e sitelen ni la ona li ike e mi
taso, mi sitelen e pilin ni kepeken toki pona la sitelen ni li pona li
suwi!
mi lukin e sitelen ni la ona li ike ala e mi
sona mi la ni li tan ni: mi sitelen kepeken toki pona la,
mi sona e kon lon pi pilin mi. pilin mi li ike la mi ken awen sona e ni:
mi ike ala
toki Inli la ni li lon ala. sitelen "mi ike" en sitelen "pilin mi li
ike" li ken sama tawa lukin